Петар Печков
Објавено: четврток, 12 октомври 2017
Реконструкцијата, надградбата и доградбата на зградата на поранешниот хотел Интернационал во центарот на градот предизвикува голем интерес во јавноста
За да се расчистат сомневањата за можна спрега на градоначалникот Чадиев и одредени бизнис групи и за грубо кршење на законските прописи и за да се дојде до вистината, на градоначалникот Чадиев јавно му ги поставуваме следните прашања:
Кога и на кој начин фирмата Макоил ја продала зградата на Хотел Интернационал, кој е новиот сопственик и дали при промената на сопственоста е платен данок на промет на недвижности.
Кој според законот е инвеститор на реконструкцијата, надградбата и доградбата на зградата на хотелот.
Според кој законски пропис е извршена пренамена на просторот за трговија, за деловни простории и за станови, бидејќи со постоечкиот детален урбанистички план за централното градско подрачје намената на зградата на хотелот е само и исклучиво за хотелско сместување.
Дали е издадено решение за локациски услови и одобрение за градење и дали во тие документи е предвидена надградба на објектот и пренамена на просторот.
Дали е одобрена студија со позитивна оценка на остварениот квалитет на сеизмичка заштита во согласност со генералната државна стратегија за контрола и намалување на сеизмичкиот ризик од Институтот за земјотресно инженерство и инженериска сеизмологија.
Дали е направена ревизија на изведбениот проект.
Кој ќе ја преземе одговорноста доколку и при помал земјотрес незаконската, нестручна, неквалитетна и дилетантска надградба на зградата на хотелот се сруши и усмрти или повреди гости во хотелот и случајни минувачи по тротоарот и улицата.
Ние ја почитуваме пресумпцијата на невиност. Никој не е виновен додека тоа не се докаже на суд. Но, сакаме да потенцираме дека одговорност мора да има за сите, без оглед на нивните позиции, доколку надлежни органи и судови во законски постапки утврдат дека е направен криминал и е оштетен јавниот интерес на граѓаните на Велес – изјави Весна Стојанов Богоевска кандидат од листата за советници на коалицијата на СДСМ.
