Петар Печков
Објавено: четврток, 28 август 2025
Притвор од по 30 дена за тројцата кавадарчани Д.Б, Д.С.двајцата по 27 години и М.Ѓ. (35 год) им изрече судија во претходна постапка од Основен суд Кавадарци, по барање на јавен обвинител од ОЈО Кавадарци.
Трите лица се осомничени дека средата наутро, пред казино, му нанеле тешки телесни повреди на нивен сограѓанин, Панче Т.на 42 години, од што подоцна починал.
Основното јавно обвинителство од Кавадарци, соопшти дека делото го квалификува како „Тешка телесна повреда со смртни последици“. До доцна вчеравечер биле испитувани осомничените но и сведоците од кривично правниот настан.
„Осомничените, од кои двајца се на возраст од 27 години и еден 35-годишник, на 27 август околу 5 часот наутро, имале вербална расправија со оштетениот во казино во Кавадарци. Потоа излегле надвор, физички го нападнале и го удирале со боксови и клоци по целото тело и глава. Оштетениот се обидел да влезе во казиното, но изгубил свест. Со ударите му нанеле повеќе тешки телесни повреди од кои починал“ – соопштија од ОЈО Кавадарци.
Кавадаречкото обвинителство информира дека во текот на истражната постапка ќе бидат обезбедени сите докази и ќе се врши психијатриско вештачење на осомничените, па доколку се утврди дека кај нив постоела свест и намера да го лишат од живот оштетениот, можна е преквалификација на делото во убиство.
Докторот од службата за итна помош од Кавадарци кажа дека кога дошле на местото на настанот, лицето веќе било починато и имало повреди на глава. Негвото тело по барање на обвинителсвото од Кавадарци е на обдукација за да се откријат причините за смртта.
