Петар Печков
Објавено: среда, 27 август 2025
Полицијата соопшти дека рано утрово во Кавадарци се случило убиство. По физички напад врз сограѓанин, извршено од три помлади лица, четириесет и две годишниот П.Т. паднал на земја.
Откако екипа на Итната помош била повикана, доктор констатирал смрт кај лицето, поради повреди на глава. Полицијата ги привела трите лица, кои се сомничат дека се сторители на делото.
„Утрово 27 август, во 04:56 часот во ОВР Кавадарци било пријавено дека на заден влез од казино на ул.„Никола Минчев“ во Кавадарци, неколку лица физички нападнале едно лице, кое паднало на земја и на кое му била потребна помош. Полициски службеници од ОВР Кавадарци излегле на местото и констатирале дека се работи за лицето П.Т.(43год ) од Кавадарци, кај кое и покрај укажаната помош, екипа од Итна медицинска помош во 05:15 часот констатирала смрт. Набргу потоа, а поради сомнение за инволвираност во настанот, од слобода биле лишени Д.Б.(26 год), М.Ѓ.(35 год) и Д.С.(27 год), сите од Кавадарци“ – соопшти Биљана Ѓаковска, портпарол на СВР Велес.
„Побарана беше интервенција утринава околу пет часот, пред казино. Наша екипа доби повик и веднаш беше на лице место, но, констатира дека лицето беше починато, без знаци на живот. Кај лицето имаше смртоносни повреди на глава“ - кажа доктор Антоан Паракеов, раководител на Службата за итна медицинска помош Кавадарци.
Во кавадаречкото обвинителство на распит се шест лица и по нивното сослушување, попладнево, обвинителството ќе излезе со деталите за кривично правниот настан. Телото на починатиот е дадено на обдукција, за да се откријат причините за смртта.
Ова е трето убиство оваа година во Кавадарци. Првото се случи на 20 јануари кога невенчан сопруг ја убил со задушување, партнарката. Второто беше на 27 јули кога брат уби брата по вербална расправија.
