Вторник попладне од 19ч. во амфитетарот на Младински парк, во Велес гостува Баскер фест, фестивал на уличната уметност. Пред почетокот настап на Александар Прија, по настанот концерт на Д` Чикс.

Посетителите ќе можат да се сретнат акробати и жонглери што со леснотија ја држат публиката во очекување, улични музичари што будат емоции, илузионисти што ќе ве натераат повторно да верувате во магија и кловнови кои со еден гест или поглед успеваат да изнудат насмевка.

Сите тие се подготвени наскоро да ја споделат својата уметност и страст, да нè поканат да се забавуваме заедно, без разлика на возраста, интересите или од каде доаѓаме. Секоја фестивалска вечер гарантира изненадувања, позитивна енергија и интеракција. Улиците ќе оживеат со звук и боја, локацијата ќе се претвори во места на средби меѓу уметниците и публиката, со специфичен фестивалски пулс што ги спојува луѓето, без разлика дали се познаваат или не“ - соопшти организаторот.

Под мотото „Побарај ја забавата“ – Баскерфест 2025 ти доаѓа! артистите од фестивалот и годинава не доаѓаат само да ги покажат своите умешности, туку да создадат заедничко искуство и сплотеност со публиката, преку своите перформанси и патувачка сцена што инспирира, зближува и остава трајни сеќавања.

Велешани и посетителите ќе можат да ги видат уметниците од десетина држави. Публиката без здив ќе ја остави Plucie Ogniem од Полска кој доаѓа со својот огнен спектакл, точка со вештини со пламени јажиња, жонглирање и спектакуларно финале со долго и континуирано „фрлање оган од уста“, ретка техника што гарантира возбуда и фотографии што ќе се паметат. 

Од Чиле пристигнува Hiram Meza, артист кој одлично ги спојува циркуските елементи, театарот и жонглирањето во енергичен и креативен настап што рефлектира долгогодишна посветеност на уличната уметност.  

Комичен настап на уницикл ќе ни донесе Mr. Mostacho, кој е циркуски артист со богата историја на улични настапи, чија точка „Equilibrium“ ветува многу смеа и изненадувања. 

Од Бразил, за првпат на Баскерфест, доаѓа и Edu Boneco, заедно со неговите кукли Carolina и Maria Beijoqueira, со кои настапува ширум светот. Со огромна публика на Instagram и TikTok, тој претставува нова генерација на уметници што носи неверојатно шоу и хумор за публиката. 

Канадскиот балон артист Sean Rooney ќе донесе живописни бои, форми и скулптури од балони, кои живеат и се менуваат во рацете на мајстор кој цел живот му го посветил на изненадување на публиката.  

Меѓу артистите на овогодишниот Баскерфест е и домашниот артист Кристијан Бенито, добро познат на македонската улична сцена кој ќе настапи со својот препознатлив стил и интеракција со публиката. 

The Beat Killers“ Academy од соседна Албанија, преку танц и сценски движења ќе внесат позитивна и фестивалска енергија, како и двете статуи од Србија – актери и перформери. 

Поврзани »